Muristek
Əvvəl sərhədlər söküldü. Hətta “sökdük” deməliyəm, çünki o vaxt az yaşıma rəğmən “sərhəd hərəkatında” iştirak etmişəm və bu hadisələrin iştirakçısı olmağım mənim ömrümün ən fəxarətli anlarındandır. Amma məsələ bu deyil, başqa şeydən danışacağıq. Hə, onu deyirdim axı, əvvəl sərhədlər söküldü. Naxçıvanın sərt iqlimində 31 dekabr gününün adamı kəsən şaxtası bir anda dönüb mülayim yaz havasına çevrildi sanki. Hər iki sahildən Arazın qırağına yenib əlini- üzünü yuyanlar, hətta qurşağadək soyunub illərdir həsrətlə baxdıqları, ayrılığa sərhəd olduğu üçün qarğısalar da müqəddəs saydıqları çayın suyu ilə yuyunanlar oldu. Sonra, bu taydan o taya-o taydan bu taya “qardaş” deyib, “ can qardaş” eşidənlərin Arazqırağı görüşləri başladı. O zamanların texniki imkanları daxilində səsucaldanlarla, mikrofonlarla qohum qardaşlarını arayıb axtaran insanların görüşləri. Hər həftənin müəyyən bir günü əhali həm o taydan, həm bu taydan Araz çayının kənarına toplanır, ucadan bağıraraq hal əhval tutur, öz qohumlarının adlarını deyərək, tapılmasını rica edir, əsri adlayan həsrətin yanğısını söndürməyə çalışırdılar…
Most Read