ယူကရိန်းနိုင်ငံအရှေ့ဘက် ဒိုးနက်စ်မြို့တဝိုက်ကို ရုရှားကျောထောက်နောက်ခံပေးထားတဲ့ ခွဲထွက်ရေးအုပ်စုတွေ ဝိုင်းပတ်ထိန်းချုပ်ထားပြီးနောက် ဖေဖော်ဝါရီ ၁၈ ရက်က ဒေသခံအတော်များများဟာ ဘတ်စ်ကားတွေနဲ့ ရုရှားကို ဦးတည် ထွက်ခွာခဲ့ကြပါတယ်။ ယူကရိန်းမှ ခွဲထွက်ရေးသူပုန်အုပ်စုက ဒိုးနက်စ်ပြည်သူ့သမ္မတနိုင်ငံ (DPR) ထူထောင်ဖို့ ကြေညာထားပြီး လက်ရှိ လူ ၇ သိန်းလောက် ဒိုးနက်စ်က်နေ စွန့်ခွာဖို့ စီစဉ်ထားတယ်လို့ ပြောပါတယ်။ ဒိုးနက်စ်မှာ နေထိုင်သူအများစုက ရုရှားဘာသာစကားပြောဆိုသူတွေဖြစ်ပြီး အများစုက ရုရှားနိုင်ငံသားဖြစ်ခွင့် ရပြီးသူတွေပါ။ ယူကရိန်းအစိုးရကတော့ DPR အုပ်စုတွေဟာ ခွဲထွက်လိုသူတွေမဟုတ်ဘူး၊ ရုရှားရဲ့ ကြိုးကိုင်ချယ်လှယ်မှု ခံထားရသူတွေလို့ ပြောပါတယ်။ ပူတင်အစိုးရကတော့ ယူကရိန်းရဲ့ နှိပ်စက်မှုကြောင့် ထွက်ပြေးလာတယ်လို့ ပြောပါတယ်။