စစ်ကိုင်းတိုင်း၊ ယင်းမာပင်မြို့နယ် မုံရွာ-ပုသိမ် ကားလမ်းဘေးအနီးမှာ ဖေဖော်ဝါရီ ၁၇ ရက် နေ့လယ် ၂ နာရီလောက်က စစ်ကောင်စီတပ်ဖွဲ့ မိုင်းဆွဲတိုက်ခိုက်ခံခဲ့ရတယ်လို့ သိရပါတယ်။ မိုင်းဆွဲတိုက်ခိုက်ခံခဲ့ရတာဟာ မုံရွာ-ပုသိမ် ကားလမ်းအနီး လုံခြုံရေးရဲတပ်ဖွဲ့ အမှတ်( ၂၈) နဲ့ မြောက်ယမားကြား တစ်နေရာမှာဖြစ်တယ်လို့ ဒေသခံတွေက ပြောပါတယ်။ မိုင်းဆွဲတိုက်ခိုက်ခံရအပြီး ကားလမ်းဘေးအနီးမှာရှိတဲ့ ပြည်သူ ၂ ဦးရဲ့ နေအိမ်တွေကို စစ်ကောင်စီတပ်ဖွဲ့တွေက မီးရှို့သွားသလို အနီးနားက ကျေးရွာနေပြည်သူတွေလည်း ကြောက်လန့်တကြီး ထွက်ပြေးခဲ့ကြရတယ်လို့လည်း ဆိုပါတယ်။ မိုင်းဆွဲတိုက်ခိုက်မှုကို Regional Friend Fighters အဖွဲ့က လုပ်ဆောင်ခဲ့တာလို့ ထုတ်ပြန်ကြေညာထားပြီး စစ်ကောင်စီတပ်သားများ ထိခိုက်သေဆုံးမှုတွေ ရှိခဲ့တယ်လို့လည်း ဆိုပါတယ်။