မန္တလေးမြို့၊ အောင်မြေသာစံမြို့နယ်၊ အောင်မြေသာစံရပ်ကွက်၊ ၁၉ လမ်း၊ ၈၆ လမ်းနဲ့ ၈၇ လမ်းကြားရှိ ရပ်ကွက်အုပ်ချုပ်ရေးမှူးရုံးမှာ ဇန်နဝါရီ ၂၉ ရက် နေ့လယ် ၁ နာရီလောက်က ဗုံးပေါက်ကွဲခဲ့ပါတယ်။ အမည်မသိ လူနှစ်ယောက်က ဆိုင်ကယ်နဲ့လာရောက်ပြီး လက်လုပ်ဗုံးနဲ့ ပစ်ခဲ့တာဖြစ်ကာ ရုံးအရှေ့ဘက်ကျ ပေါက်ကွဲခဲ့တာဖြစ်တယ်လို့ သိရပါတယ်။ “နေ့လယ်လောက်က ဖြစ်တာ။ ပေါက်ကွဲမှုဖြစ်ပြီး မကြာဘူး။ လူနာတင်ကားရောက်လာတယ်။ တစ်ယောက်ကို တင်သွားတယ်။” လို့အခင်းဖြစ်ရာ အနီးနားနေ ပြည်သူတစ်ယောက်က ပြောပါတယ်။ ဗုံးပေါက်ကွဲမှုကြောင့် ထိခိုက်ဒဏ်ရာရသူဟာ လုံခြုံရေးတာဝန်ကျတဲ့ တပ်ကြပ်ကြီးတစ်ယောက် ဖြစ်ပြီး ဘယ်ဘက်လက် မိုင်းစထိမှန်ခဲ့တာလို့ သိရပါတယ်။